Love @ Po Leung Kuk

母親背起孩子，所擔起的除了孩子重量，更有別人目光、家人想法、長輩意見、同儕壓力、自我質疑、對孩子期望，那重量有時令媽媽也忘記了自己。

特殊孩子媽媽情況更甚。

五歲的梓謙有自閉傾向，梓謙媽媽在照顧孩子時像變了另一個人。

「我會乜都鬧左先，好想佢快d跟上進度，好想佢快d肯聽從指令。」

怒氣背後，是壓力，是無助，是擔心。

「好想兒子由主流教育轉到特殊幼兒中心，呢個係對佢最好安排，長輩卻反對。喺公眾地方，因為兒子唔聽話，外人常時報以奇怪目光，最難聽係聽到人講『你個仔係咪傻架？』令我自信心好低落。」

自閉症孩子不善表達情感，因此社交能力亦較弱。在管教上，父母很想改善，卻有時適得其反，變成了壓力的源頭，關係的破口。

一年多前，梓謙開始在保良局曹金霖幼兒學習中心受訓，梓謙媽媽亦在社工及臨床心理學家的幫助下，了解如何管教特殊孩子。

中心強調建立孩子自信，鼓勵梓謙做小班長；治療師亦作出針對性介入，以梓謙喜歡的英文作切入點，開始訓練。起初梓謙在上堂時仍有打人的行為，一年多後，行為及自我管理能力亦大大改進。

至於梓謙媽媽，亦在過程中重新認識自己，掌握母子關係的真諦。

「我唔可以將別人標準掛喺自己兒子身上，以前嘅我，一心想兒子進步，卻無理會自己都應該要進步，過份要求孩子其實係無用嘅。社工同埋臨床心理學家令我了解到，我疏忽左自己做家長嘅應有態度。我好想多謝盧經理、社工馬姑娘、臨床心理學家吳生，喺我最困難嘅時候陪住我成長！」

曹金霖幼兒學習中心盧頴經理表示：「我好欣賞梓謙媽媽好努力去學習，亦都好重視同梓謙嘅關係。喺幫助特殊孩子嘅同時，我哋更加需要係陪伴家長去面對，因為一方面家長扮演好重要嘅角色，佢哋嘅積極參與、正面接納小朋友嘅態度，對改善孩子情況帶來事半功倍，另一方面，家長往往係最受壓果個，我哋必須要有專業支援。」

表達能力、情緒控制的改善，令梓謙在最新一次評估只是輕度，更令梓謙媽媽感到欣慰是，他與兒子關係的改善，「兒子常時會走來叫我一齊玩車車，又要我抱抱。」當問到有什麼說話想跟梓謙說，媽媽深呼吸了一口氣，然後說：「梓謙多謝你陪住我，我哋一齊努力，你嘅出現，令我知道媽媽有好多野都要學習，多謝你俾機會我學習做一個好媽媽！」

世上最難擔任的崗位，就是父母，然而，卻只能邊做邊學，梓謙媽媽回顧自己與孩子的改變，很想勉勵同路人：「你開心，孩子就會開心架！所以，盡量自己開心一點，放鬆一點，孩子係會俾你嘅欣賞打動架！」

淚水養大孩兒，在此向每一位媽媽，送上最真摯的祝福及感謝。